Soomaaliya oo garaacday Burundi (Basket-Ball) Sawirro + Codad

Xulka Soomaaliya ee wiilasha kubadda Kolayga ee ka qeyb galaaya isreeb-reebka tartanka Qaramada Africa ee ka socda dalka Tanzania ayaa caawa kulankoodii labaad ee qeybta B ku garaacay dalka Burundi 98-80 dhibic.

Waxa ay toos ugu gudbeen Soomaaliya Semi Finalka kadib markii shalay 81-78 kaga adkaadeen Kenya.

Xulka Soomaaliya Waxa ay Semi finalka Jimcada la ciyaari doonaan Xulka Rwanda oo qeybta A kaalinta labaad kaga soo baxay. Masar oo qeybta A kaalinta koowaad kaga soo baxday ayaa Semi Finalka la ciyaari doonta Kenya oo kaalinta labaad B kaga soo baxday.

Afratan xul ee isugu soo haray tartanka ayaa xulkii soo baxa ee noqda horyaalka Zone 5 waxa uu si toos ah uga qeyb gali doonaa koobka Qaramada Africa ee Basket-Ball-ka ee ka dhici doona dalka Ivory Coast bisha August ee sanadkan.

Xulalka 7-da ah ee isreeb-reebkan u dhaxeeyo ayaa la isku yiraahdaa Zone 5, waxa ayna ka mid yihiin 8-da Zone ee Africa ee isreeb-reebka kubadda Kolayga ciyaara.

Macallinka Xulka qaranka kubadda Kolayga ee hoggaaminaya ciyaartoydan guusha weyn soo hoysay Cumar C/qaadir Baarajab, ayaa ka codsaday dhammaan shacabka Soomaaliyeed iyo shirkadaha ganacsiga in ay garab istaagaan wiilasha qaranka Soomaaliya matalaaya.

Waxa uu wareysi uu siiyay Raadiyaha Bar-Kulan ku sheegay in uu sanadkan xulka guulo waaweyn oo lama-illaawaan ah soo hoyn doonaan.

Halkan Hoose ka dhageyso wareysiga Baarajab.

Sidoo kale kabtanka xulka qaranka Yuusuf Qaafow oo la hadlay Radio Bar-Kulan, ayaa sheegay in guushan ay u aheyd mid ay filaayeen, isagoo ka codsaday shacabka Soomaaliyeed taageero buuxda.

Halkan ka dhageyso Wareysiga Kabtanka.

Xulka kubadda Kolayga Soomaaliya u matalaaya ayaa guulo muhim ah soo hooyay, waxa ayna u baahan yihiin in dadweynaha Soomaaliyeed ay dhiirri geliyaan wiilasha u istaagay difaca calanka Soomaaliyeed.

—————————————————————

by, Ibrahim gedow Awale (Biibbo), tifaftiraha Somgoal, injineerka3@hotmail.com 

————————————————–

Photo by Biibaaye